Qəbələ BHL, Hava gəmilərinə texniki xidmət göstərən personalın hazırlığı üzrə Texnik-mexanik (B-3) proqramı

Azərbaycan Hava Yolları” Qapalı Səhmdar Cəmiyyətinin Milli Aviasiya Akademiyası “Hava gəmilərinə texniki xidmət göstərən personalın hazırlığı üzrə Texnik-mexanik (B-3) kursları” na qəbul elan edir.

Proqram haqqında qısa məlumat:

"Hava gəmilərinə (təyyarələrə) texniki xidmət göstərən personalın hazırlığı üzrə Texnik-mexanik (B-3) kursları" Azərbaycan Aviasiya Qaydalarının (AAQ-147 və AAQ-66) tələblərinə uyğun olaraq təşkil ediləcəkdir.

Proqramı uğurla tamamlayan və imtahanlardan müvəffəqiyyətlə keçən iştirakçılara, AAQ-147 tələblərinə uyğun fəaliyyət göstərən "Texniki xidmət üzrə Təlim təşkilatı" tərəfindən Tanınma Sertifikatı təqdim ediləcəkdir. “Tanınma Sertifikatı” almış şəxslər Azərbaycan Hava Yolları QSC-də müvafiq peşə kateqoriyaları üzrə işlə təmin olunacaqlar.  İş təcrübəsi və ixtisas səviyyəsinə uyğun olaraq, həmin şəxslər gələcəkdə "Hava gəmilərinə texniki xidmət göstərən personalın şəhadətnaməsi"ni də əldə edə biləcəklər.

Proqramın müddəti: 9 - 12 ay  

Tədris dili: İngilis dili 

Cessna 172S təyyarələrinin texniki heyətinə xidmət etmək üçün ümumilikdə aşağıdakı vəzifə təlimatları nəzərdə tutulur:

• Təyyarənin hər bir uçuşdan əvvəl və sonra ümumi vəziyyəti yoxlanılmalıdır;             
• Uçuşa başlamazdan əvvəl mühərrik, elektrik sistemi, güc və uçuş idarəetmə sistemləri diqqətlə yoxlanmalıdır;
• Yağ, yanacaq, filtrlər və digər mühərrik avadanlıqları müntəzəm olaraq dəyişdirilməli və təftiş edilməlidir;
• Elektrik sistemi, batareyalar, generatorlar və elektrik dövrələri müntəzəm yoxlanılmalı və lazım olduqda təmir edilməlidir;
• Bütün komponentlər müntəzəm olaraq nəzarət edilməli, hər hansı bir zədə və ya qeyri-adi vəziyyət aşkarlanarsa, dərhal təmir edilməli və ya dəyişdirilməlidir;
• Yanacaq filtrelərinin dəyişdirilməsi və yoxlanılması da vacibdir;
• Uçuş idarəetmə sistemləri düzgün işlədiyindən əmin olunmalıdır;
• Avionika və idarəetmə panelləri tam funksional olmalıdır, hər hansı bir problem olduqda, dərhal texniki təmir edilməlidir;
• Təyyarə uçuşa hazır vəziyyətə gətirilməli və uçuş prosedurlarına uyğun olaraq bütün yoxlamalar aparılmalıdır;
• Təyyarənin təhlükəsizlik protokollarına uyğunluğuna diqqət edilməlidir, məsələn, təhlükəsizlik kəmərlərinin düzgün bağlanması, müvafiq işıq işarələri və siqnalların işləməsi;
• Hər bir təmir və xidmət proseduru haqqında detallı hesabatlar hazırlanmalı və müvafiq uçuş kitabına qeyd edilməlidir;
• Təyin olunan müddət ərzində edilən baxışların, təmir və dəyişdirmələrin tarixləri qeyd edilməlidir;
• Texniki heyət həmçinin uçuş təhlükəsizliyinə dair beynəlxalq və yerli aviasiya təşkilatlarının tələblərinə uyğun fəaliyyət göstərməlidir.

Proqramda iştirak üçün namizədlərə olan tələblər:

• Tələblər: Ali/ orta təhsil
• Dil bilikləri: Azərbaycan dili - əla, İngilis dili- orta
• Riyaziyyat/Cəbr biliyi: Minimum orta məktəb proqramı səviyyəsində
• Fizika biliyi: Orta məktəb proqramı səviyyəsində və daha yüksək
• Yaş: 21-30 yaş arası
• İş yeri: Qəbələ BHL

Qeyd: Tələblərə cavab verən namizədlərin İngilis dili, Fizika və Riyaziyyat üzrə bilikləri imtahan vasitəsilə yoxlanılacaq. İmtahandan uğurla keçən namizədlər Aviasiya mütəxəssislərindən ibarət komissiya tərəfindən müsahibə ediləcəklər. Müsahibədən müvəffəqiyyətlə keçən namizədlər proqrama cəlb ediləcəklər.